Witajśo na web-boku Serbskego šulskego towaristwa z.t.
Zhromadnje serbski wuknuś jo dyrdakojstwo!
Toś ten online-projekt jo wažny kšac za dalšne efektiwizěrowanje pśiswójenja serbšćiny na zakłaźe našogo Modeloweho projekta Witaj®. Was pśewóźuju figury Majka, Leńka, Karlo a mały Flori.
Witaj®
W lěśe 1998 smy w Dolnej Łužycy z modelowym projektom Witaj® zachopili proces rewitalizacije dolnjoserbšćiny a smy stwórili zakład za cełostny koncept pśiswójenja serbšćiny wót góletkownje až k abiturje, a to w Bramborskej a Sakskej. Ako swójske mě pšawniskie šćitane jo se Witaj® wuwijało ku kwalitnemu zygeloju Serbskego šulskego towaristwa z.t.
Pó 20 lětach jo dojśpił modelowy projekt Witaj® regionalne, krajne a europejske dimensije. Zajm za ranu dwójo- a wěcejrěcnosć njepśiběra jano mjazy nimskimi a serbskimi starjejšymi, ale teke mjazy wědomnostnikami.
Proces pśiswójenja serbšćiny wjeźo se na šulach w Bramborskej na zakłaźe bilingualneje wucby we Witaj®-rědownjach abo -kupkach na rozdźělnu wašnju dalej. W Sakskej pśiswójuju abo rozšyrjaju sebje wukniki rěcne zamóžnosći na zakłaźe koncepcije 2plus abo z pomocu serbšćiny ako cuzeje rěcy. Taki cełostny a dalewjeducy koncept pśiswójenja serbšćiny lubi pak jano wuspěch, gaž se w dowěrliwem zgromadnem źěle wšych wobźělonych zrealizěrujo.
Komu słužy web-bok?
Institucionelne spěchowanje rěcy jo jaden z nejwažnjejšych nadawkow źiśownje a pśedšulskego kubłanja. How połože se zakłady za dalšne wuwiśe góleśa. Wjelgin dobre serbske rěcne zamóžnosći su teke trjebne za start do šule a wuspěch w šuli. To njepśitrjefijo jano za maminorěcne źiśi ale teke za źiśi ze serbšćinu ako druga abo cuza rěc.
Myslimy how tek na starjejšych, kótařež bydle we Łužycy abo tek zwenka njeje a kśě swojim źiśam serbsku rěc wustnje a pisnje z pomocu toś togo online-projekta posrědniś abo skšuśiś. Dla togo su trjebne rěc spěchujuce materialije ako wobraze, rymy, spiwy a graśa, z kótarymiž mógu kubłaŕki/kubłarje a staršjejše cełostnje a ze wšymi zmysłami źiśi w swójich rěcnych zamóžnosćach spěchować. To wótpowědujo zakładnemu principoju pedagogiskego źěła w źiśecych dnjowych pśebywalnišćach.
Mimo togo mógu sebje tek staršjejše na toś tu wašnju gromaźe ze swójimi źiśimi serbšćinu pśiswójś.
Dla togo jo Serbske šulske towaristwo wuwijało serbskorěcne materialije a ideje za praksu na wósebnej web-stronje.
Co was wótcakujo?
Comy kubłaŕkam a kubłarjam wšake wólažcyś a jim daś taki źěłowy rěd do rukow, až mógu z pomocu našogo materiala źiśi efektiwnjej rěcnje spěchować a projekty pśewjasć, kótarež złožuju se na temy z wobswěta źiśi. Móžośo sebje tek ku kuždej zaběrje wuśišćaś bogato ilustrěrowane źěłowe łopjena, wurězaś a ze źiśimi basliś graśa abo z pomocu pśedłogow zachopiś licyś.
Toś ten online-projekt comy dłujkodobnje z wopśimjeśami połniś. Nazgónite kubłaŕki nas pódpěruju. Pózdźej góźe se tek spiwańka k spěchowanju rěcy na tós tej stronje k dispoziciji stajiś.
Na toś tom web-boku stoj interakcija, komunikacija a rozšyrjenje serbskego słowoskłada źiśi a jich wobswěta w srjejźišću. Jadnotliwe kubłańske wobłuki maju didaktisku funkciju.
1. baslenje a twórjenje
2. pógibowanje
3. eksperiment
4. gropna motorika
5. drobna motorika
6. koncentracija
7. matematiske pśedchadne zamóžnosći
8. zeznawanje
9. rěc
10. recept
11. wulicowańko
12. fonologiske wuwědobnjenje
13. rym
Koncentrěrujomy se spócetnje na sad a wšo, což jo z toś teju temu zwězane.
Wjele wjasela pśi prědnem wirtuelnem rozwjaselenju w serbskej rěcy za pśedšulske źiśi.
