Materialije

download na kóńcu teksta

pśedłoga za wuśišćanje

barwiki

wódna barwa

nožyce

plastilinowy gumij (Knetgummi)

běła papjera

słomka (Strohhalm)

kuchniska papjera

nitka

Pśigótowanje

Wuśišćajśo pśedłogu na tłusćejšu papjeru.

Pśewjeźenje

Zaběra z mandala spěchujo koncentraciju rowno tak ako drobnu motoriku a źiśi se pśi tom mjazy drugim teke změruju. Powědajśo z nimi nejpjerwjej wó temje sad z tym, až je na pśikład pšašaśo: Kaki sad wy znajośo? Co dajo se ze sadom wšykno gótowaś? Kótary sad wy nejlubjej jěsćo? Pótom dajśo kuždemu góleśeju słomku. Pśikrotcćo gromaźe ze źiśimi słomku na něźi 6 cm. Dajśo źiśam k tomu dwě abo tśi pśikrotcone słomki, tak až toś te ku swójej słomce pśipołožyju a z barwikom wótpowědnu dłujkosć markěruju. Na markěrowanem městnje źiśi zbytk słomki wótstśigaju. Pótom pśitykaju wšykne kusk plastilinowego gumija na jaden kónjack krotkeje słomki. Toś ten gumijowy kónjack tunknu do barwy a z nim wobraz z dypkami wugótuju. Za kuždu barwu ma se druga słomka wužywaś. Gaž dypki wěcej njejsu rědne, ale kradu našmarane, móžo se gumijowy kónjack z kuchniskeju papjeru wótrěś.

Na kóńcu kužde góle swój mandala wustśigajo. Kreslanki se natykaju na nitku a se wupowjesyju w rumje abo na sćěnje.